عمرو محمود ياسين يعلق على انسحاب رامي صبري من غناء تتر مسلسل"وننسى اللي كان"

تحدث المؤلف عمرو محمود ياسين، عن الشائعات التي يتم اطلاقها من وقت لآخر تجاه الفنانة ياسمين عبدالعزيز بطلة مسلسله الرمضاني "وننسى اللي كان"،خاصة بعد تغيير تتر المسلسل وانسحاب المطرب رامي صبري من غنائه.

وقال عمرو ياسين: "حقيقي انا مش مصدق اللي بيحصل مع  الفنانة ياسمين عبد العزيز  لو تتر اتغير من حاجة لحاجة يبقى ياسمين.. لو ممثلة او ممثل بيقول جملة معينه هنا او هنا يبقى ياسمين ... (طيب انا  رحت فين) لو حد لابس لبس معين يبقى ياسمين!! ".

وتابع: "لو شخصية متسمية اسم بعينه يبقى ياسمين .. واقسم بالله ان هذا غير حقيقي! لان المسلسل له مؤلف ومخرج ومنتج و استايلست واقسام تخصصية".

وأوضح: "احنا مش  هواه.. احنا بنشتغل وكل واحد فينا بيحترم دور الاخر وكل واحد مسؤول عن اختصاصاته ودوره في العمل ..اكيد بنتشاور وبنفكر مع بعض كلنا للوصول لأفضل قرارات اللي فيها مصلحة المشروع..  بس الموضوع كله تصفية حسابات للأسف الشديد".

واستكمل: "وهي بقت مش عارفة تعمل ايه لما تطلع ترد.. الناس تقول لها بتردي ليه؟  ولما تسكت الناس بتصدق الاتهامات !".

وأضاف: "حقيقي أنا بشفق عليها ولكن اللي بيخليني  اهدى أن ياسمين قوية جدا .. جدا جدا و بتقابل ده كله بسخرية وضحك وبترد تقولي انا مش شايفاهم بس انا متعود اواجه والناس اللي بتتابعني عارفين عني ده و لازم الجمهور يعرف الحقائق  لأن انا بعتبر الهجوم على ياسمين هو جزء من الهجوم على مشروعي اللي كلنا بنبذل فيه مجهود كبير  جدا   جدا ..وربنا يصلح حال الجميع ..وخالص التقدير والاحترام للجميع".