عمرو سلامة يكشف عن 7 ملاحظات بشأن فيلم "برشامة"

 كشف المخرج عمرو سلامة، عن ٧ ملاحظات بشأن فيلم"برشامة" الذي تم طرحه بالسينمات في عيد الفطر المبارك.
وقال عمرو سلامة: "‏سبع ملاحظات على فيلم (برشامة): الكتابة.. الكتابة.. الكتابة.. المقولة المشهورة بتقول "الكتابة هي الملك"، والكتابة يعني مش بس موهبة، وكمان وقت، وكذا دماغ بتفكر سوا، وتعديلات، واقتراحات، ونسخة نهائية تطلع بعد استنفاذ كل محاولات التطوير.
وتابع: الجودة، أحلى درس مستفاد، إن الكوميديا بيفرق معاها الجودة، جودة الإخراج، الإنتاج، التمثيل، الكاستينج، التصوير، المزيكا، المونتاج، وكل العوامل الثانية، إن الكوميديا تتعمل بجودة مهم، مش المنطق الكسول بتاع علشان بنعمل فيلم كوميدي نبقى بنهرج وبس، والمهم الضحك وكل حاجة ثانية مش مهمة.
واستكمل : الإيثار من نجم العمل، أو بمعنى أصح تغليب مصلحة الفيلم على مصالحه الضيقة، إنه يبقى مستعد وهو نجم يقدر يعمل فيلم يتصدره بالكامل يدي مساحة للي حواليه، هشام ماجد مش بس ممثل وإنسان محترم وشخصية سالكة، هشام ذكي عارف إن مصلحة فيلمه ككل من مصلحته المباشرة.
وأوضح: التوقيت، نزول الفيلم مع منافسة معقولة ما تسحقوش، موسم منطقي - بعيدا عن كارثة وفضيحة سحب فيلم بعد نزوله وإجازته من الرقابة - لكن كان موسم متوازن وعادل.
وتابع: التوفيق، والحظ السعيد إن معظم نجوم الفيلم كانوا مكسرين الدنيا في الموسم الرمضاني، مع افتقاد الناس لهشام ماجد علشان اختفى الموسم ده.
وأضاف: الإصرار، إصرار المخرج والمنتج والكتاب على الفيلم، وإيمانهم بيه. بعد ست أو سبع سنين من محاولات صنعه اللي واجهتها مصاعب كثير.. الإيمان بالجمهور، الجمهور لما يتقدمله حاجة حلوة هيعرف يقدرها، اه الجمهور داخل يضحك، وضحك، بس عارف يقدر الصنعة ويحترم المجهود، ويفهم الاختلاف.. مبروك لكل صناع العمل، وكل الأمنيات إن باقي الصناع - ولا استثني نفسي - يتعلموا و"يغشوا" من برشامة الدروس الصح.