النائب فريد البياضي يستجوب الحكومة لعقد امتحانات بالتزامن مع أعياد  المسيحيين

تقدمت اليوم  بطلب إحاطة عاجل موجه إلى رئيس مجلس الوزراء، ووزير التربية والتعليم، ووزير التعليم العالي، بسبب تكرار عقد امتحانات في بعض المدارس والجامعات خلال الأعياد الرسمية للمسيحيين.

بصراحة، ده موضوع محتاج وقفة جادة، لأن ماينفعش أسرة تلاقي نفسها مضطرة تختار بين فرحة العيد والصلوات والالتزامات الأسرية، وبين مستقبل أولادها وامتحاناتهم.

الدستور واضح في المادة 53 إن المواطنين متساوون أمام القانون من غير تمييز، وفي المادة 64 إن حرية الاعتقاد وممارسة الشعائر الدينية حق مكفول، وكمان المادة 19 أكدت إن التعليم حق لكل مواطن.
وعشان كده، احترام الأعياد الرسمية لازم يبقى احترام حقيقي على أرض الواقع، مش مجرد كلام مكتوب.

أنا طالبت الحكومة بإصدار تعليمات واضحة وملزمة لكل المدارس والجامعات، الحكومية والخاصة والأهلية، بعدم عقد أي امتحانات في أيام الأعياد الرسمية للمسيحيين، وكمان عدم عقد امتحانات في اليوم اللي بعد العيد مباشرة، مع مراجعة جداول الامتحانات قبل اعتمادها، ومحاسبة أي جهة تخالف ذلك.

المطلوب هنا مش استثناء لحد، لكن تطبيق حقيقي للدستور، واحترام فعلي لمبادئ المواطنة والمساواة وتكافؤ الفرص.