أول تعليق من لميس الحديدي بعد احتفالها بخطوبة ابنها نور عمرو أديب

 علقت الإعلامية لميس الحديدي، على حفل خطوبة ابنها نور عمرو أديب الذي حضره عدد من الفنانين والشخصيات العامة. 

وقالت لميس الحديدي: "ساعات الكلام يعجز أن يعبر عن كل المعاني.. معاني الشكر و الإمتنان لكل الحب و السعادة اللي حاوطتني في خطوبة ابني نور أديب وحبيبتي القمر مريم السطوحي.. المشاعر الحقيقية بتبان وبتوصل وأنا امبارح كنت في طوفان حب حقيقي وصلني من كل الناس". 

وتابعت: "عائلة مريم الجميلة اللي زودوا عيلتي، أهلي وعائلة ابني وأصحابي اللي دايما سندي وفي ضهري.. صوت صديق عمري هشام عباس اللي ملا الدنيا فرح.. سعادة ليلى علوى وإلهام شاهين وهالة صدقي .. كل الاتصالات اللي وصلتني من مصر ومن خارج مصر.. كلها كانت امبارح طاقة فرح امدني الله بها" .

وأوضحت: "دايما بنسمع أغنية يا دبلة الخطوبة ونضحك ونفرح.. وأنا بقدم الشبكة كان جوايا مشاعر كتير “مختلطة” ده ابنى نور الصغير اللى لسه كنت بأوصله اتوبيس المدرسه الحمد لله كبر و بقى عريس .. و زى كل ام بتفتكر الطريق الطويل و الحلم ان يصل ابنها لبر الأمان رغم رغم الصعاب ..دى حكاية كل ام و حكايتي".

وأضافت: "شكرا لكل كلمة حب، شكرا لكل ابتسامة وضحكه من القلب، شكرا انكم شاركتوني فرحتي، شكرا للدعم اللي دايما محتاجاه وبيسندني.. ودايما الحمد لله الحمد لله الحمد لله، فأفضالك ونعمك عليا لا تحصى ويكفيني انك رزقتني بإبن بار وصالح وابنة جميلة بنت عيلة طيبة وأصيلة".