المؤلف أيمن سلامة يكشف تفاصيل تعرض زوجته لأزمة صحية ودخولها العمليات

 كشف المؤلف أيمن سلامة، عن تعرض زوجته لأزمة صحية ودخولها غرفة العمليات بأحد المستشفيات.
وقال أيمن سلامة:"أصعب تجربة ممكن يمر بيها إنسان .. الخميس الماضي اتصل بي ابني مروان يبلغني أن مامته تصرخ من ألم بساقها وأنها لاتستطيع الوقوف ولا النهوض من مكانها واتفقنا على طلب الإسعاف واتقابلنا في مستشفى الشروق بالمهندسين..في الأول شكوا أنها جلطة بالساق لكن الأشعة والتحاليل في الطوارئ أكدت انه لأ ".

وتابع: "عملوا أشعة على الضهر لقوا كسر بالعامود الفقري علما بأنها لا اتخبطت ولا وقعت ولا اي شئ ، وقالوا لازم عملية فورا ، لكن التحاليل أكدت أنها مش جاهزة للعملية ، سيولة مرتفعة في الدم ونسب عالية في كل حاجة وزي ما اتقالي دي حالة ماينفعش تدخل عمليات ، لكن استشاري المخ والأعصاب قال لو مدخلتش العمليات خلال 24 ساعة هتكون معرضة لشلل تام ودكاترة التخصصات الأخرى بيقولوا دي ماينفعش تدخل عمليات ونسبة خروجها لاتزيد عن 50 ‎%‎ ".

واستكمل: "عشت ساعات من الحيرة ودخلتني الفنانة نهال عنبر - اللي بشكرها من كل قلبي - مع خمس دكاترة استشاريين ونفس الكلام ..بتوع المخ والاعصاب بيقولوا لازم عملية فورا وبتوع التخصصات الاخري يقولوا استحالة دي تدخل عمليات وبقيت مخير مابين تأجيل العملية لحد الحالة ما تتظبط وده معناه شلل مؤكد ومابين ريسك العملية اللي هامضي على اقرار أنها على مسئوليتي وانهم بلغوني بالحالة كاملة وقالولي 50‎%‎ تطلع سليمة".

 وأوضح:"جالي الدكتور أشرف زكي اللي مهما شكرته لايمكن اوفيه حقه ، اصر يكون جانبي وقالي استخير ربنا وبعد المغرب شد علي ايدي وقالي توكل علي الله ، هي هاتكون بين ايدين ربنا ، وربنا ارحم مننا جميعا ودخل العناية لزوجتي وشد من أزرها وقالها هتقومي وافتكري كلامي ده كويس ودخلت العمليات وخرجت قرب الفجر وكلنا على أعصابنا لكن ربنا فعلا ارحم مننا جميعا ، هي حاليا في الرعاية المركزة لكن الحمدلله الحالة بتتحسن وشالوا أجهزة التنفس الصناعي وألف حمد لك يا رب".

وأضاف :"دعواتكم أن ربنا يتمم شفاها وربنا ما يحط حد في الموقف اللي كنت فيه، ومرة تانية وتالتة بشكر الدكتور المحترم الانسان اشرف زكي اللي فضل جانبي ساعات طويلة وكان معايا خطوة بخطوة وبشكر الفنانة نهال عنبر اللي جت المستشفى فورا والفنان احمد سلامة والفنان علي كمالو اللي جم ايضا المستشفى وكذلك كل اعضاء مجلس النقابة / الصديق ايهاب فهمي / الصديق اشرف طلبة / الصديق ايمن عزب / الاستاذ منير مكرم وكل الزملاء والاصدقاء سواء اللي اتصل او جالي المستشفي .. نسألكم الدعاء لزوجتي".