بعد رسالته المثيرة للجدل.. مي فاروق تطلب من الملحن نادر نور التعاون معه

 وجهت المطربة مي فاروق، رسالة للملحن نادر نور تطلب منه التعاون معه في أغنية جديدة من ألحانه، بعد رسالته المثيرة للجدل خلال الساعات الماضية.

وقالت مي فاروق: "أنا كنت واخدة إجازة شوية ورجعت أشتغل على حاجات وأول الأسامي اللي كنت قايلة اني حابة أتعامل معه هو أنت يا نادر ومحمد شاهد على الكلام ده".

وأضافت:"وبما انك أخونا الغالي ومبدع دايما فأنا عايزة أعمل أغنية من ألحانك من فضلك".

 وكان نادر نور كتب عبر حساباته الشخصية على موقع التواصل الاجتماعي فيسبوك:"بعتذر لكل الناس اللي بتبعتلي كلمات اغاني من فضلكم متبعتوش تاني.. معنديش مشاريع شغال عليها و لا نجوم بتسمع مني اغاني و لا عندي حاجة اقدر اساعدك بيها لاني ببساطة محتاج اللي يساعدني..
و للناس اللي بتتهمني بالكسل و التقصير انا فعلا بعدت فترة لاسباب شخصية و بحاول ارجع من ٣ سنين و مش عارف".

وتابع:"مسيبتش باب مخبطتش عليه.. فقدت التواصل مع الاغلبية العظمى داخل الوسط الغنائي منهم نجوم اشتغلت و نجحت معاهم و منهم اللي بحاول اشتغل معاه للمرة الأولى و منهم اللي عشرة عمر و مشوارنا بدأناه مع بعض و احلام حلمناها و نجاحات حققناها سوا و اللي بيرد على التليفون مرة مبيردش تاني و بقيت احس بالرفض و عدم التقبل و انا مش متعود ازن على حد او اطلب الحاجة اكتر من مرة بشكل يقلل مني و من احترامي لنفسي بعد كل اللي قدمته حتى لو كان قليل فهو كبير من وجهة نظري".

وأضاف:"أخيرا معنديش مشاكل مع حد و لا بكتب الكلام ده لكسب تعاطف حد و كل الاحترام و التوفيق لزملائي انا مش زعلان من حد.. و أسف على الاطالة".