كواليس ألبوم "حبيتك" لـ عمرو دياب قبل طرحه بالأسواق

 كشف الموزع الموسيقي أمير محروس تفاصيل التحضيرات لألبوم عمرو دياب الجديد "حبيتك"، مؤكدا أن العمل على الألبوم بدأ منذ نحو 6 أشهر، وأن الهضبة يتعامل مع كل ألبوم وكأنه أول ألبوم في مسيرته.

وقال أمير محروس، إن عمرو دياب يمر بمرحلة طويلة من اختيار الأغاني قبل الاستقرار على القائمة النهائية. 

وتابع: "بقالنا 6 شهور شغالين في الألبوم الجديد، والهضبة في كل ألبوم بيعمل عدد أغاني كبير جدا، وبعدها يقعد يختار أحسن ما فيهم، واللي شايف إنه لايق عليه وعلى جمهوره. هو عارف كويس جدًا صوته حلو فين، وإيه الأغنية اللي هيقابل بيها جمهوره في الحفلات".

وأضاف: "إحنا ممكن نوصل لـ36 أغنية متنفذ ليها كل المراحل، حتى الميكس والماستر، وفي الآخر يصفيهم لـ12 أغنية بس هما اللي ينزلوا للجمهور. حتى ألبوم (ابتدينا) كان في البداية حوالي 28 أغنية معمول لها كل حاجة، لأنه كل سنة بيعتبر نفسه إنه بيبدأ من جديد". 

وأختتم حديثه: "الشغف اللي عند عمرو دياب مش طبيعي، والإصرار اللي جواه إنه يتفوق على نفسه كل سنة حاجة مبهرة. بالرغم من التاريخ الكبير اللي عمله، لكنه كل سنة عنده نفس الحماس، وبيبذل مجهود جبار، وكمان بيجبر كل اللي شغالين معاه يتعبوا ويشتغلوا بنفس الشغف، بسبب حبه للشغل والأفكار اللي بيقدمها".