عمرو محمود ياسين يعلق على الزلزال الذي تعرضت له عدد من محافظات الجمهورية

علق السيناريست عمرو محمود ياسين، على الزلزال الذي وقع فجر اليوم الاثنين بعدد من المحافظات.
وقال عمرو محمود ياسين:"أولا حمدالله على سلامة الجميع.. الحمدلله لحد دلوقتي مفيش أي اخبار سيئة وان شاء الله تكون عدت على خير .. و ماحدش يقلق من التوابع لأنها بتكون أقل حده من الزلزال الرئيسي".

وتابع:"ونخلي بالنا في بوستات لانهيارات لمباني معمولة Ai فا منشاركش الكلام ده ونتأكد قبل الشير".
واستكمل:"اما التنبيه اللي وصل لناس وناس لا فالمجد للاندرويد ولا عزاء لعبيد التفاحة اللي ماسكين ايفون.. تليفونك الايفون مش بيقولك اللي بتتصل بيه مع ويتنج ولا لا ..مستني منه يقولك خلي بالك في زلزال؟ بس مش مهم المهم ان في تفاحة في ضهر الموبايل". 

وأوضح:"النقطة الأهم بقى .. هو الاندرويد مش بيتنبأ بالزلزال قبل حدوثه... هو الزلزال بيكون بدأ بالفعل قرب مركزه لكن أندرويد بيحاول تحذير الناس البعيدين قبل ما توصل لهم الهزة القوية..طيب الحكاية دي بتحصل ازاي؟، الفكرة بسيطة جدا معظم موبايلات أندرويد فيها حساس حركة اسمه Accelerometer لو في مجموعة كبيرة من الموبايلات في منطقة واحدة رصدت اهتزاز مشابه بتيجي باعته إشارات لسيرفرات جوجل مع الموقع التقريبي ".

وأضاف:"طبعا جوجل مش بيعتمد على موبايل واحد لكن بيجمع بيانات عدد كبير من الموبايلات في المنطقة ويحللها عشان يعرف ده زلزال فعلا ولا ايه وفين وازاي ابتدى وايه قوته تقريبا.. الاعتماد ببقى على أجهزة كثيرة عشان مايبقاش الموضوع مجرد حادث عارض لاجهزة وقعت مثلا .. وبالطريقة دي بيحصل الموضوع بسرعه جدا و بيتبعت التحذير وده احيانا بيكون مفيد ويخليك تاخد حذرك .. وربنا يسترها علينا جميعا ويحقظ مصر".