آمال رمزي: "اتجوزت ٣ مرات اتنين منهم خانوني وأجهضت نفسي ١٥ مرة"

 كشفت الفنانة آمال رمزي، تفاصيل وكواليس حياتها الشخصية والفنية .
وقالت آمال رمزي: "الأولاني كان بيخوني على سطر ويسيب سطر ناس كتير قالوا لي وأنا قفشته وطلبت الطلاق كان قريبي ومخرج وبيدرس بره وشافني في إسكندرية وطلبني للجواز… وماما قالت له دي مجنونة تمثيل لكنه آخر خيانة له كانت مع رقاصة.. آخر واحد الله يرحمه ابن ناس كان من أبطال الصاعقة محسن عشماوي يمكن لو كنت محظوظة كان يبقى عايش لدلوقتي".

وتابعت: "كنت صغيرة وكنت بهجض نفسي ١٥ مرة كنت خايفة أخلف وخايفة من المسؤولية. محسن عشماوي قابلته بعد ما كبرت لو كنت قابلته بالأول كنت خلفت لأنه كان محترم …كان بيجي لي في كواليس التصوير وبيهتم بيا…. معرفتش أطبخ وهو كان بيطبخ لي شخصية لن تتكرر لما عملت حادثة بعربيتي شالني للدور السادس، الوحيد في حياتي اللي حبني جدًا كان متدين وابن ناس وشهم ….في ٤٨ ساعة تعب فجأة ومات كنت زي المجنونة.. أنا زعلت عليه لدرجة رفضت أشتغل بعد وفاته كنت نفسيًا تعبانة جدًا بعده".

واستكملت: "أنا ندمانة إني مخلفتش وكنت بقول لمامتي ولاد أخويا ولادي قالت لي لا ولادك إنتي حاجة تانية مسمعتش كلامها والشغل أخدني بين المسرح والسينما..دلوقتي حسيت بكلمتها…البيت كبير وأنا قاعدة فيه لوحدي ولاد أخواتي بيجوا لي يومين بالأسبوع بس بالآخر أنا لوحدي…. كان نفسي أخلف طفلين زوجي اللي عشت معاه عشرين سنة وفي الآخر اتفاجئت إنه حرمني من الميراث… كان جه له كانسر وأولاد أخويا عزموني على شاليه كانوا لسه شارينه بالساحل فروحت أسبوع… بتصل أطمن عليه شتمني عشان سيبته وهو بالمستشفى.. الحقيقة كان معاه حق مع إني كنت بحبه وكان حنين وكريم بس كنت خايفة من زوجته الأولى ووجودها لأنها مكانتش بتحبني".

وأوضحت: "اسمي الحقيقي جمالات عباس…. سمير صبري وأحمد رمزي وعمر الشريف كانوا في مكتب جوزي للإنتاج فقعدوا يختاروا لي اسم واختاروا اسم جوزي آمال صلاح الدين قلت لهم جايز أنفصل….. أحمد رمزي بخفه دم قال نسميها آمال رمزي وتبقى أختي في الحرام، أنا من دفعة عادل إمام وأبو بكر عزت وسعيد صالح بدايتي كانت مع عمالقة.. ماري منيب شافتني في دوري بالبيچاما الحمرا وقالت لعادل خيري البنت دي عندها كيميا وهتبقى ممثلة مسرح هايلة…. العلاقة بينا كانت رائعة كل يوم أدخل أوضتها نتكلم وحبتها أوي كانت أم حنية مع كل الناس و كانت بتيجي المسرح وهي معاها أكل للقطط والكلاب كنت بقولها يا ماما".

وتابعت:"اشتغلت مع سعاد حسني فيلم بابا عاوز كده …أنا شفت عبد الحليم حافظ عندها ببيتها أكتر من مرة وفهمت إنهم اتجوزوا كان بيحبوا بعض وهي مكنتش بتقول وأنا محبتش أتدخل في حياتها عبد الحليم كان بيغير عليها جدًا كان فيه شاب مصور حلو اسمه صلاح كريم وصلها مرتين وده زعل عبد الحليم جدا وكان بيراقبها بعربية قديمة ويشوفوها بتسهر وبتروح فين….
نادية لطفي دعمتني بقوة كنا جيران وكنت بطلب منها أمثل.. وفيلم البيه البواب كان لعادل إمام واعتذر عنه وأحمد زكي قالي إنه عاوزني بالدور معاه…كنت زوجة عادل إمام قبل ما يرفضه لكن أحمد نقل دوري لضيفة عشان أنا بيضا زي صفية وكان وجهة نظره لازم زوجته تبقى سمراء زيه.. بحب عادل إمام دمه خفيف مش متعالي وسمير غانم لا أنسى أفضاله عليا واشتغلت معاه كتير".

وأضافت: "بزعل أوي من عمليات التجميل ليا صديقة بحبها أوي بقت مبتعرفش تتكلم..كل سن وله جماله صفية العمري وميرفت أمين محتفظين بجمالهم.. هند رستم قابلتها في تصوير وقالتلي إنتي بلدياتي لأن أبوها كان ظابط من إسكندرية وقالت لي إنتي عندك صوت مميز
مش بحب أحوش أي حاجة بحب أشتريها بجيبها ودلوقت عايشة على معاش جوزي.. كان عندي كتاب جابته لي وزارة الثقافة فتحته قلت أنا اشتغلت كل ده ومفلسة".