بعد حالة الجدل.. المطرب عمر كمال يعتذر للجمهور بسبب كلمات احدى أغانيه

قدم المطرب عمر كمال، اعتذارا للجمهور بسبب كلمات احدى أغانيه القديمة التي أثار بسببها حالة من الجدل خلال الساعات الماضية.  

وقال عمر كمال: "أنا طالع أشرح لناس لغط، أو في بوستات كتير شوفتها على موضوع أغنية كنت عاملها، عشان متفهمش غلط".

وتابع: "من 4 سنين كنت بنفذ أغنية وكان فيها عبارة بتقول (أنا الشيطان السالك يا ملايكة يا منافقين)، وكان الغرض من الكوبليه ده إني أقول أنا وحش وإنتو حلوين، أنا وحش ممكن يكون فيا حاجة حلوة، وإنتو عاملين ملايكة بس فيكو حاجات كتير وحشة".

واستكمل: "بعد ما خلصت الأغنية وسمعتها لناس حواليا قبل ما تنزل قالولي يا عمر الكلام ده مش حلو ممكن يتفهم بكذا معنى، فحاولت أغيره، وقفلت من الأغنية ومنزلتهاش".

وأوضح: "فعلا منزلتش الأغنية بسبب ممكن تكون كلمات فيها حرمانية وتجرأ على الملايكة.. اللي يعرفني يا جماعة يعرف إني طالع من بيت متدين، ومفيش عقل ولا منطق يقول إني أتجرأ على ربنا أو على ديني".

وأضاف: "معرفش ليه كل فترة حد يطلع يستخدم الكلمات دي وينزلها من أول وجديد ويعمل مشكلة، وبعتذر لأي حد سمع الكلام ده ومش فاهم حقيقة الموضوع".