رانيا فريد شوقي تطالب بحل جذري لملف الرفق بالحيوان: "وصلنا لمرحلة الخطر"

 طالبت الفنانة رانيا فريد شوقي، بضرورة التعامل مع ملف الرفق بالحيوان في مصر بشكل أكثر جدية، وتوفير حلول تحمى الحيوانات وتحافظ فى الوقت نفسه على حقوق المواطنين وأرزاق العاملين.

وانتقدت رانيا فريد شوقى عبر "فيسبوك" استمرار مشاهد تعذيب الحيوانات في الشوارع، وغياب الرقابة والمحاسبة، داعية إلى منظومة متكاملة تشمل الإيواء والتعقيم والتطعيم وتنظيم امتلاك وتجارة الحيوانات، قائلة: "إحنا فى 2026، بنتكلم عن التطور والتحول الرقمى، ولسه عربية كارو ماشية فى شوارعنا، حمار أو حصان بيجر أحمال لا تُحتمل، ولما جسمه مايستحملش ويتوقف من التعب، يتضرب عشان يكمل".

وتابعت: "محدش بيقول نقطع عيش حد... لكن أكيد فيه بدائل تحفظ للإنسان رزقه وترحم الحيوان، وتوفير البدائل دى مسؤولية الدولة، والموضوع مش خيول وحمير بس... كلاب وقطط بتتعرض للقتل والتعذيب، وحيوانات بعد سنين من خدمة أصحابها، أول ما تمرض أو تكبر يترموها فى الشارع... مع إن الحيوان مسؤولية، مش منفعة أو تسلية تنتهى لما يضعف أو نزهق منه".

وأَضافت: "فيديوهات تعذيب الحيوانات اللى بتخرج من مصر بيشوفها العالم كله... وده بيسيء لصورتنا وممكن يضر بالسياحة، وبالنسبة للكلاب والقطط الحرة، أعدادها بقت كبيرة جدًا نتيجة مشكلة اتسابت تتراكم لسنين... ومابقاش ينفع نسيبها تتفاقم سنين كمان، إحنا وصلنا لمرحلة الخطر".

واستكملت: "فيه ناس عندها خوف شديد أو فوبيا من الكلاب، ومن حقها تمشى فى الشارع وتحس بالأمان... وفى نفس الوقت، وجود الحيوان فى الشارع خطر على الحيوان نفسه بسبب اذيت البشر. والتعقيم والتطعيم خطوة مهمة جدااا، لكنها مش الحل كله، زى ما القتل والتسميم أو الرمى فى الصحراء مش حل. ده تعذيب مقنع»، موضحة: «اللى شفناه فى بعض المحافظات يخلينا نسأل: هل تم التحقيق فيما حدث؟ ومين المسؤول؟ وهل تمت محاسبته؟ والأوجع إن غياب الحل بيكبر المشكلة... وممكن توصل لجريمة الناس اللى بتساعد وبتعمل خير وبيحاولوا ينقذه من الأذى، بقوا هما كمان بيدفعوا الثمن: إهانات وهجوم ومشاكل، لمجرد إنه رفض يقف يتفرج على حيوان بيتعذب أو مريض أو جعان".