هجوم من بشرى على طارق الشناوي بعد انتقاده لفيلم "أولاد حريم كريم"

علقت الفنانة بشرى على هجوم الناقد الفني طارق الشناوي على فيلم "أولاد حريم كريم" ووصفه للفنانات المشاركات بالعمل قائلا: "الحريم اللي مش مطلوبين أوي في السينما".

وقالت بشرى من خلال حسابها على موقع الصور والفيديوهات إنستجرام ردا على طارق الشناوي ورد مصطفى قمر على تصريحاته: "أنا آسفة يا مصطفى لكن أنا شايفة أن كل واحد حر فى رأيه والرأى لا يمثل إلا صاحب الرأى لكن الجمهور شأن آخر والغالبية قد قالت كلمتها ورأى واحد سلبى وغير موضوعى أمام آلاف الاشادات فى قاموس النسبة والتناسب يساوى ١ فى الالف أو المليون ودى نسبة لا تذكر ثم لو الاستاذ طارق شايف ان حضرتك قديم واحنا كلنا ١٢ بطل وبطلة من الجيلين كلنا قدام هو حر".

وأضافت الفنانة بشرى قائلة: "مع أنك يا أخى من اكتر النجوم معاصرة وتجديد ومن اول من احدث تطوير فى الاغنية المصورة واغانيك بتتلعب فى كل مكان ومحفوظة من كل الاجيال والغالب مستمر ف اسمحلى اقولك يا مصطفى احنا نسيب كل جديد وحديث للاستاذ طارق واحنا قاعدين مبسوطين ومرحرحين ومظأطاطين فى القديم..ده حتى المثل بيقول القديمة تحلى ولو كانت وحلة..الا صحيح ما هو التعريف الرسمى للقديم وللحديث فى المعجم الوجيز ؟! انا شخصيا من مواليد التمانينات.. واحب القديم قوى..ده حتى البقال معندوش جبنة جديدة بس عنده جبنة قديمة.. كان بالأحرى بالناقد الكبير كتابة نقد موضوعى وعدم اهمال جهود ١٢ ممثل فى الفيلم ومنهم مجموعة من الشباب الواعد فقط لان فى امر مشخصن كما يبدو مع شخص نجم الفيلم.. طب مش عاجبك القديم يا استاذ طارق فى ٦ وجوه جديدة فى الفيلم كلهم مش عاجبين حضرتك؟؟؟ ده قرار واعى بتحطيم الشباب بقى..اذن لا تحدثنى عن الحداثة وتتهمنا بالقدم".