أحمد حلمي: "كنت بحب خالة صاحبي ومكنتش متخيل إني هيبقا معايا فلوس"

تحدث الفنان أحمد حلمي عن بدايته الفنية، وظروفه المالية في بداية حياته، وعلاقته بزوجته منى زكي وقصة الحب التي تربطهما.

وقال أحمد حلمي خلال لقائه مع أنس بوخش في حلقة خاصة من برنامج abtalks : "عشت ظروف مادية قاسية في طفولتى ووالدي بيعمل فى السعودية السعودية  10 سنين ورجعنا لمصر وحاول استثمار فلوسه وخسرت".

وتابع قائلا: "واعتمدت على نفسى واشتغلت أكثر من شغلانة وقت دراستي وكنت برسم على زجاج المحلات وبعمل ديزاينات وديكورات المسرح واشتغلت في مطبعة للملابس، عمري ماتخيلت إني هيبقى معايا فلوس وأبقى مشهور".

وتحدث عن علاقته بزوجته الفنانة منى زكي: "الناس بتقول إن بعد سنين من الجواز الحب بيختفي لكن في جملة كانت ضمن فيلم وأحد الأبطال وضّح الفرق بين الحب قبل الزواج وبعده، وقال إن المرحلة الأولى اسمها مرحلة الوقوع في الحب".

وأضاف حلمي: "متزوج من منى زكي من عام 2002 والجواز حياة مختلفة وأهم شيء في الزواج هو الوصول للغة الثالثة لأن الرجل عنده لغة بيتكلمها والست عندها لغة بتتكلمها وزي ما يكون هو بيتكلم إنجليزي وهي فرنساوي وفي لغة تالتة مشتركة وهي إن الاتنين يتعلموا لغات بعض".

وأضاف: "بيتقال إن لما مراتك تبقى متخانقة في الشغل أو مع صاحبتها وانت تقول رأيك وتلبس قبعة الحكيم هي هتضايق وانت مش هتفهم ليه اضايقت لأنها عايزة تتسمع بس وبعد ما تخلص اسألها عن رأيها وبعدها قول رأيك".

وقال: "منى سند حقيقي وبتمثل البلورة اللى أنا عايش فيها وبشوف نفسى من خلالها وزى ما بيقولوا وراء كل رجل عظيم امرأة أعظم منه المفروض.. ومنى عندها كمية كبيرة من الصدق بهتت عليا".

وكشف أحمد حلمي عن تفاصيل حياته في الطفولة حيث وقع في حب خالة صديق له وهو في سن صغير.