خالد الصاوي: اتجوزت متأخر لأني كنت غبي ومغرور واستخسرت نفسي

كشف الفنان خالد الصاوي، عن سر زواجه متأخرا بعدما تقدم في العمر، وذلك خلال لقائه في برنامج كلمة أخيرة الذي تقدمه الإعلامية لميس الحديدي.

وقال خالد الصاوي: أنا اتجوزت متأخر، وأنا عندي 48 سنة، كنت غبيا ومغرورا وكنت محوش ومستخسر نفسي، وكان لازم أتجوز مراتي من بدري وهي مالهاش مثيل، ومن أخطائي إني تأخرت في التفكير في الإنجاب، وكنت خايف فيروس C اللي عندي ينتقل لـ الأولاد لو خلفت.

وتابع خالد الصاوي موجهًا نصيحة للشباب: معركتي مع الوقت كنت غبيا أوي فيها، خسرت وقتا كتيرا جدًا ونقطة الغباء اللي عندي عايز أقولها علشان أبقى مفيد، تخيلوا اللي عنده 40 سنة أصغر مني، وبقول للشباب خلوا بالكم علشان الصحة والفلوس، والوقت حاجات مش مطلقة، وهتبقى طول الوقت موجودة، والملذات هي الفخ ومتخليش الفخ ده يطير عمرك وصحتك وأحلامك، حاول تفرمل بدري.

وأوضح: أنا كنت مريض بفيروس سي، وبعد ما دفعت دم قلبي في تكاليف العلاج بالخارج في الآخر تعالجت في بلدي، وأشكر وزارة الصحة المصرية وأطباء بلدي، والمشروع العظيم الذي قامت به الحكومة المصرية لعلاج مرضى فيروس سي، والتجربة أثبتت إن الأمراض المتوطنة يجب علاجها في بلدها.

وأضاف خالد الصاوي: تجربة المرض كانت مهينة في أولها وانتهت بالإيمان، لإني كنت مغرورا جدا وشايف نفسي إن صحتي تمام وقوي ومستقل برأيي، ودخول التجربة يخلي الواحد يحترم نفسه ويؤمن بربنا والقضاء والقدر والرضا، ويبدأ في إصلاح علاقته بالكون.