د. ريم العقاد أخصائية التغذية توضح أفضل الطرق لتجنب الشعور بالجوع في نهار رمضان

بعد سنوات عديدة يأتي رمضان هذا العام في فصل الشتاء، فمنذ سنة 1999 لم يزورنا الشهر المُبارك في هذا الفصل، ومن المعروف أن فصل الشتاء يتسم بمواصفات غذائية معينة حيث يحتاج عدد وجبات مشبعة أكثر لأن الإحساس بالبرد يزود الشعور بالجوع، فبالتالي نحتاج دائمًا إلى الأكل والحلوى للحصول على الدفئ.

وفي هذا الإطار تقدم الدكتورة ريم العقاد، أخصائية التغذية، مجموعة من النصائح لإتباع نظام غذائي صحي يقضي على الجوع ويحقق الإشباع المطلوب في رمضان.

قالت دكتورة ريم في تصريحات خاصة لموقع "مصر الآن" أن هناك عدة أشياء يجب اتباعها للتغلب على إحساس الجوع والعطش في نهار رمضان، وكانت أولها عدم شرب الكافيين سواء قهوة أو شاي، بالإضافة إلى الحلويات والحوادق. ونوهت أيضًا أن الإحساس بالجوع يكون في أول أربع أو خمس أيام فقط.

وأضافت: "نأخر السحور على قد ما نقدر ونشرب قبل وجبة السحور كوبايتين مياه أو شوربة مفيش مشكلة خالص وبعد السحور برضوا كوبايتين مياه مش بالكميات الكبيرة لازم الـ 2 أو الـ 3 لتر اللي هنشربهم يتوزعوا من الفطار للسحور".

وعن الوجبات المشبعة وقت السحور التي تساعد على التقليل من احساس الجوع في رمضان.. قالت دكتورة ريم العقاد" ضروري ناخد بروتين وهاي بروتين وحبوب كاملة علشان منعطش.. نعمل ده إزاي، أول حاجة فول أو بيض الإثنين دول هايلين جدا في السحور مؤشر الشبع بتاعهم عالي جدا ف مش هيجوعوا.. زبادي يوناني أو الزبادي البلدي بيبقى قريب جدا من اليوناني لإن البروتين بتاعه عالي ف بيشبع أكتر، وجبة الشوفان مع الحليب أو الزبادي بس بلاش نحط عسل أو حاجة مسكرة علشان دي بتجوع أوي، الموز أو التمر أو المشمشية المجففة"

وأضافت: " بلاش الأجبان عمومًا لأنها بتجوع وتعطش وبتبهدل الدنيا.. العدس حلو أوي أوي وبيشبع كمان، بلاش أي حاجة مصنعة والحاجات اللي فيها دهون كتير أو سكريات لإن زي ما قولنا بتجوع ومش بتظبط الهضم خالص.. العيش نخليه كامل الحبة البلدي العادي بتاعنا بلاش الأبيض والكيك والمعجنات والحاجات دي على السحور خالص.. كمان الخضار مهم جدا يعني مثلا وجبة الزبادي بالخيار دي هايلة جدا لا هيجوع ولا هيعطش".

أما عن أصحاب أمراض ضغط الدم المنخفض، فإن وجبة الموز والتمر مع اللبن بيعوض كثيراً جداً سواء تم أخذهم على الفطار أو السحور.

وتابعت دكتورة ريم قائلة: "في كمان وجبة حلوة أوي بتعلي من الإحساس بالشبع جدا عبارة عن 2 أو 3 عدد بيض ومعاهم زيت زيتون وسبانخ ويتعملوا أومليت لو أخدنا دي وأخدنا معاها طبق زبادي بالخيار وأي فاكهة زي التفاح متبقاش معصورة ضروري كده مش هيجوع ممكن ييجي وقت الفطار  ويفكروه بالفطار بالعافية".

أما عن سؤالها كيف نتجنب حدوث تُخمة على الأكل أثناء الفطار..

أوضحت قائلة: " مينفعش نبقى جايين ونقوم شاربين ماية كتير وأكل كتير مرة واحدة هيجيلنا تخمة فورًا ومش هنقدر نتحرك هنلاقي حتى جسمنا بيزيد".

أفضل طريقة لتجنب حدوث تُخمة على الفطار

قالت: "أحسن حاجة إن إحنا أول ما المغرب يأذن ناخد مثلا كوباية ماية أو عصير يُفضل يكون طبيعي وسكرها قليل أو ماية ومنقوع فيها بلح أو التلت تمرات عادي جدا ونقوم نصلي ونرجع نبدأ بالشوربة لازم تكون موجودة تروي الدنيا ولازم كمان علشان العطش وتاخد مساحة وناخد معاها سلطة وممكن يكون فيها بروتين ولو أي مقبلات وننزل بعدها نصلي التراويح وممكن بعدها بقا نبدأ ناكل الوجبة الأساسية ومعظم الناس في الدول العربية بيعملوا كده وبرضوا نحاول منتقلش فيها اوي نخلي النص خضار والربع بروتين والربع أي كربوهيدريت موجودة".

تابعت: " هنيجي على السحور هتلاقي الدنيا لطيفة تلت معالق فول مع كوباية زبادي أو اللبن أو الموزة بس مش أكتر من كده، علشان كده ضروري نقسم أكلنا مناكلش مرة واحدة".

واختتمت حديثها قائلة: " الحلويات بلاش تبقى كتير لو مضطرين وهناكل كل يوم تبقى قطعة صغيرة بحيث إنها متعطشناش ولا تجوعنا فناكل أكتر فيحصل تخمة من كتر الأكل مرة واحدة".