فريدة سيف النصر: كفاية مش عايزة أي تكريمات عن دوري في العتاولة

أعلنت الفنانة فريدة سيف النصر، أعتذارها عن تلقيها أي تكريم عن دورها في مسلسل العتاولة الذي عرض في رمضان المنقضي.

وقالت فريدة سيف النصر، عبر موقع فيسبوك: والنبي ما تزعلوا مني افهموا طبعي، والله العظيم ده التكريم 15، وقبله جرائد كبيرة وقنوات وحتى في لبنان وجريت هربت.

وتابعت: وكل سنة كتير، أنا مش من هواة لم شهادات وتماثيل.. وأجري لوحدي وكأني نمبر وان العمل، لأ أي عمل عملته وراه ناس كتير أوي لنجاحي.

وأضافت: أنا باخد اللي أكبر من كل ده أنا في حضن قلبي جمهوري، واللي بيعمله معايا دائمًا رغم أي حد بيردم على نجاحي تراب، هما بيشيلوا التراب ويحطوا دهب والماس.

وأكدت:  بحبهم اللي كنوز الدنيا ما تقدرش تشتريه لأي حد.. أعتذر كل تكريم وبحبكم لكن من الظلم ترك الآخرين في الظل.

وأردفت: سامحوني دي فريدة وتفكيرها اللي جايبني ورا لكن هاعمل إيه دي أنا، بالمناسبة بتكلم عن زملاء عجبوني أوي اتقال لي انتي عبيطة بتنوري غيرك اللي ماجابش سيرتك تاني، أنا مالي دي أنا، ويمكن ضميري ده اللي محبب خلق الله فيا بأمر من رب العالمين، يا ناس خلوها على الله دي كلها متر في متر فوقوا والنبي.