إلهام شاهين عن حضورها الاحتفالات في ظل أحداث فلسطين: الحياة لازم تستمر

علقت الفنانة إلهام شاهين، على حضورها احتفالية الجمعية المصرية لكتاب ونقاد السينما باليوبيل الذهبي، حيث نشرت مقطع فيديو لها على حسابها الشخصي، بموقع تبادل الصور والفيديوهات إنستجرام.

وقالت إلهام شاهين، في الفيديو: أنا تقريبا مانمتش يعني فتحت التليفزيون وبدأت أشوف الأخبار مصدقتش اللي بيحصل في فلسطين، قلبنا موجوع جدا وعايزين نقولهم إن مش معنى إننا بنحضر مناسبات أو مهرجانات طبيعي الحياة لازم تستمر، لكن إحنا جوانا ألم كبير جدا للي بيحصل في فلسطين.

وتابعت: يعني اللي بيحصل امبارح ناس نايمة في خيم على الأرض وبيوتها تهدمت، فتتفجر وتتحرق ونشوف مناظر ونسمع صراخ يعصر القلب عصر، المجتمع الدولي فين من اللي إسرائيل بتعمله وخرق كل المواثيق الدولية وكل ما يخص حقوق الإنسان شيء زاد عن حده.

وأكدت: بالرغم أن كل المجتمع أو أغلبه دلوقتي مع فلسطين وحق فلسطين في إقامة دولتها ومع حقهم في دفاعهم عن أرضهم، إسرائيل بتقول أنا بحارب الإرهاب أي إرهاب؟ اللي بيدافع عن أرضه يبقى إرهابي، أنا لو حد قرب من مصر أنا أول واحدة هنزل أحارب عن مصر وكلنا هننزل نحارب لو كل واحد بيحارب عن بلده اسمه إرهابي أنا بعلن إني النهاردة هكون إرهابية.