حمزة علاء يوضح موقفه من الشائعات ويؤكد ولاءه للنادي الأهلي

خرج حمزة علاء، حارس مرمى الفريق الأول بالنادي الأهلي، عن صمته ووجه رسالة لجماهير القلعة الحمراء عبر حسابه الشخصي على «إنستجرام»، ردًا على الأنباء التي تم تداولها مؤخرًا بشأن رفضه التحدث مع إدارة النادي.

وقال حمزة علاء في رسالته: "حابب أوضح حاجة مهمة بخصوص الكلام اللي اتقال عني في الإعلام مؤخرًا، واللي بيقول إني رفضت أقعد مع إدارة النادي أو الناس المسؤولة في النادي اللي أتشرف بالانتماء ليه منذ طفولتي وحتي الآن. الكلام ده كله مش حقيقي ومفيش منه أي حاجة صح."

وأضاف: "أنا عمري ما اتأخرت عن أي اجتماع يخص مصلحة النادي، وبحترم كل شخص مسؤول في الكيان ده، وموجود دايمًا علشان أسمع وأتكلم في أي وقت يتطلب كده."

وتابع قائلاً: "النادي ده ليه مكانة كبيرة عندي، وكل يوم بفتخر إني بلبس التيشيرت بتاعه. وبحس دايمًا بدعمكم اللي لا يقدر بثمن، واللي هو الدافع الحقيقي في كل يوم ليا في نادينا العظيم."

وأشار حمزة علاء إلى تقديره الكبير لجماهير النادي الأهلي، قائلاً: "ولجمهور النادي الأهلي، انتم ليكم فضل كبير جدًا جدًا عليا، وإنتوا سبب كبير جدًا ورئيسي في اللي وصلت له. محبتكم وسندكم عمرهم ما كانوا عاديين، وأنا شايل ليكم تقدير وحب كبير اوي جوه قلبي."

وفي ختام رسالته، أكد حمزة علاء ولاءه الكامل للنادي الأهلي وجماهيره، قائلاً: "عمري ما أقدر أغلط ولا في النادي ولا في جمهوره ولا في أي مسؤول داخل النادي، وأنا مش الشخص اللي يكون ده موقفه مع النادي، فأنا أتشرف بالانتماء اليه وإلى جماهيره، كل الحب والاحترام للنادي الأهلي وجمهوره العظيم."