"أنا عايش ومش هسكت".. شريف مدكور يرد على شائعة وفاته

ظهر الإعلامي شريف مدكور لايف على صفحته الرسمية على "فيسبوك" علشان يرد بنفسه على شائعة سخيفة انتشرت عن وفاته، لما سيدة قررت تنشر فيديو تدّعي فيه الخبر الكاذب.

وقال مدكور  بوضوح: "أنا عايش والحمد لله، واللي حصل دا مش هزار"، وأكد إن والدته اتصدمت من اللي اتقال، خصوصًا إنه حاليًا برا مصر، فالموضوع جِه عليها قاسي جدًا.

و أعلن مدكور بلهجة حاسمة إنه هياخد كل الإجراءات القانونية ضد السيدة اللي نشرت الفيديو، وقال: "اللي بتعمله دي مش محتوى، دي جريمة تستحق السجن"، وانتقد أسلوبها في تقديم فيديوهات كلها شائعات وأذى نفسي للناس.

وفي نهاية الفيديو، وجه رسالة للناس: "خلوا بالكم من اللي بتصدقوه، وكل واحد له أهل وناس بتخاف عليه".