حمزة علاء يودع الأهلي برسالة مؤثرة: أصعب قرار في حياتي.. ولكني أفكر في مستقبلي

وجه حمزة علاء، حارس مرمى الأهلي السابق، رسالة مؤثرة عبر حسابه على "إنستغرام"، شكر فيها النادي الأهلي وجماهيره، ووضح موقفه بشأن مستقبله الكروي بعد قراره بالرحيل عن القلعة الحمراء بنهاية الموسم الماضي.

استهل علاء رسالته باعتذار عن التأخر في الإعلان، قائلًا: "أكيد الكلام جاي متأخر وعشان كده حابب أعتذر، من حوالي شهر أخدت أصعب قرار في حياتي، وهو إني أسيب بيتي بعد 16 سنة من عمري قضيتهم في النادي الأهلي".

وأكد الحارس الشاب على صعوبة القرار، لكنه شدد على أهمية التفكير في مستقبله: "قرار الرحيل كان صعبًا، لكن كان لازم أن أفكر في مستقبلي.. يمكن الفرصة مجتش زي ما كنت أتمنى بس كل حاجة بتحصل بيبقى ربنا كاتبها ورب الخير لا يأتي إلا بالخير".

خص حمزة علاء جمهور الأهلي برسالة امتنان خاصة: "لجمهور النادي الأهلي العظيم محبتكم وشكركم عمرهم ما كانوا مرتبطين بعدد الدقايق اللي لعبتها دايما كنتوا سند في كل لحظة، في كل بطولة.. حسيت معاكم إني أحسن حارس في العالم وأنا بلعب في بطوله أفريقيا والأولمبياد، كل اللي طلبته إنكم تفضلوا فاكرين إني كنت واحد منكم وابن من أبناء النادي الأهلي".

ولم ينس علاء توجيه الشكر لإدارة النادي وزملائه والمدربين والعمال: "لإدارة النادي الأهلي شكرًا على كل لحظة حسيت فيها إني جزء من الكيان.. وأقول لزمايلي إنتوا إخواتي وعيلتي اللي عمري ما هنسي أيامها وبتمني ليكم كل التوفيق والنجاح". وأضاف: "لكل مدرب اتمرنت معاه داخل النادي، شكرًا من كل قلبي على كل لحظة دعمتوني فيها أو علمتوني فيها حاجة، ولكل عامل تشرفت بالشغل معاه انتم عارفين معزتكم عندي".

اختتم حمزة علاء رسالته بتأكيد ولائه الدائم للكيان الأهلاوي وتطلعه لمستقبله الكروي: "لشعب الأهلي هفضل دائمًا مشجع للكيان من قلب التالتة شمال ويا رب أرفع راسكم وأكون عند حسن ظنكم في خطوتي الجاية، وتكونوا دائمًا في ظهري وسند ليا زي ما طول عمركم عودتوني.. أشوف وشكم على خير.. ابنكم حمزة علاء".