حمزة نمرة: “نجاح ألبومي الأخير فضل من ربنا.. والجمهور سبب استمراري”

بعد النجاح اللافت لألبومه الأخير "قرار شخصي"، عبّر الفنان حمزة نمرة عن فرحته الكبيرة بالنجاح غير المتوقع، مؤكداً أن ذلك تجاوز توقعاته بشكل كبير.

ونشر نمرة عبر حسابه على إنستجرام: "زمان، لما حد يسألني: هل حاسس إنك مش واخد حقك فنياً؟ كنت دايمًا مش متأكد، وغالباً كنت أقرب للفكرة إني فعلاً كده".

وأضاف: "لحد ما يوم قعدت مع نفسي وسألت السؤال ده بجد، اكتشفت إن ربنا إداني أكتر مما أستحق، ووصلني لأبعد مما يفترض إني أوصل له بحسابات الدنيا والورقة والقلم".

وتطرق حمزة إلى الصعوبات التي تواجهه كفنان يمشي عكس التيار: "أنا لا بغني مواضيع رائجة، ولا أعمل موسيقى شبه الرائج، ولا أفرض نفسي بالزن على الودان، وفوق ده كله انطوائي وما بعرفش أخلق علاقات في مجالي.. المفروض أكون بالكتير على هامش الفن، لكن الحمد لله، اللي بأقدمه وصل للجمهور وانتشر بالشكل ده، وده فضل من ربنا كبير".

وختم الفنان حديثه بشكر جمهوره، مؤكداً أنهم السبب الرئيس في استمرار فنه: "كل واحد سمعني، اتكلم عني، نشر أغنية ليا، حضر لي حفلة.. ربنا جعلكم سبب في إن فني يفضل عايش. وسامحوني على أي تقصير، وأشكر كل اللي وقفوا جنبي من قلبي".