باسم يوسف: “أمي كانت بتتشتم بسببي.. واتعلمت إن الشهرة ليها تمن”

في حوار صريح جمعه بالإعلامي أحمد سالم في برنامج كلمة أخيرة، فتح الإعلامي باسم يوسف قلبه للجمهور، متحدثًا عن التغيّرات اللي حصلت في شخصيته وردود الأفعال على عودته للساحة الإعلامية من جديد، وقال: "اتقال عني مش ده باسم، اتغير، وأنا فعلاً اتغيرت. فات 11 سنة، والدنيا علمتني كتير، بقيت إنسان مختلف وعندي تجارب وخبرات جديدة، ومبسوط بالشكل اللي أنا عليه دلوقتي."

و كشف باسم عن الجانب الإنساني الصعب اللي عاشه بسبب الشهرة، خصوصًا مع والدته – رحمها الله – اللي تأثرت بالانتقادات اللي كانت بتوجه له عبر الإنترنت. وقال:> "أمي كانت بتتشتم وهي قاعدة في بيتها، لمجرد إنها أم واحد بيشتغل على اليوتيوب. كانت بتتعذب من الكلام اللي الناس بتقوله، ومقدرتش تستمتع بشغلي."

وأضاف مازحًا: "أمي قالتلي علّمني إزاي أدخل على اليوتيوب عشان أشوف فيديوهاتك، وده كان أسوأ قرار خدته في حياتي، لأنها شافت تعليقات صعبة جدًا كانت بتوجعها."

باسم يوسف اختتم كلامه بتأكيد إن الزمن غيّر في كل الناس، وإن التجربة علمته يتعامل مع الشهرة بنضج أكتر، مؤكدًا إن اللي حصل خلى عنده تقدير أعمق للهدوء، والعيلة، والخصوصية.