ماس رحيم تطرح أولى أغنيات ألبومها الجديد «ضيعتني»

أعلنت المطربة الشابة ماس رحيم عن إطلاق أولى أغنيات ألبومها الجديد بعنوان «ضيعتني»، وهي من كلمات وألحان والدها الموسيقار الراحل محمد رحيم، وتوزيع كريم أسامة، ومن إنتاج شركة ديجيتال ساوند.

ماس كشفت إن الأغنية دي ليها مكانة خاصة في قلبها، لأنها من اختيارات والدها شخصيًا، واللحن كان من ألحانه القديمة أيام شبابه، وقالت إن الإحساس اللي فيها هو نفس روح رحيم اللي اتعود عليها الجمهور، وأضافت: "بابا كان شايف إن الأغنية دي شبهي، وإن محدش هيقدر يقدمها غيري، وكان دايمًا بيهتم إن كل عمل في الألبوم يبقى حالة مختلفة".

وتابعت ماس إنها بتعتبر الألبوم كله رسالة حب ووفاء لوالدها اللي غيّر شكل الموسيقى العربية على مدار أكتر من 30 سنة، وقالت إنها بدأت علاقتها بالمزيكا من وهي عندها 5 سنين، وكانت بتعيش جوّ البيت المليان نغمات وآلات، لحد ما بدأت تلحن وتكتب وهي صغيرة، ووالدها كان أول من لاحظ موهبتها وساعدها تنميها.

ماس حكت كمان عن العلاقة المميزة اللي كانت بينها وبين والدها، وقالت: "كنا بنتكلم بلغة المزيكا، نفهم بعض من غير كلام، نغني لبعض ونتبادل الإحساس"، وأكدت إنها فخورة إنها بتمشي على خطاه وبتكمل مسيرته اللي لسه فيها كتير الجمهور ما سمعهوش.

الأغنية بتحمل كلمات مليانة إحساس وألم ناعم، منها:
"ضيعتني منك للهو، جرحتني منك لله، خليتني أحزن على اللي فاتو، وأندم على قلبي وهواه..."

وختمت ماس كلامها بتمنّي إن الأغنية تعجب الجمهور، وقالت إنها مش بتغني لنفسها بس، لكن لذكرى والدها اللي علمها إن المزيكا رسالة بتعيش، حتى بعد اللي صنعها.