هشام جمال: "مش مصدق إني اتجوزت ليلى زاهر.. والناس بتحب العلاقات اللي فيها صدق»"

في أول ظهور تليفزيوني لهما بعد الزواج، حل الفنان هشام جمال وزوجته ليلى أحمد زاهر ضيفين على الإعلامية إسعاد يونس في برنامج «صاحبة السعادة»، حيث تحدثا عن تفاصيل ارتباطهما وردود فعل الجمهور بعد إعلان الزواج، الذي تصدّر مواقع التواصل خلال الفترة الماضية.

بابتسامة مليانة حب ودهشة، قال هشام جمال: «مش مصدق نفسي إني متجوز ليلى أحمد زاهر وقاعد معاها في الاستوديو»، مضيفًا إن ارتباطه بليلى هو أجمل حاجة حصلت له في حياته، واصفًا زوجته بأنها «إنسانة طيبة وبنت ناس».

 وأكد أن الناس تفاعلوا معاهم بحب كبير لأن الجمهور يحب العلاقات الحقيقية اللي بتبدأ بخطوة جدية مش لعب.

وعن علاقة الجمهور بليلى، قال هشام: «هي كبرت قدام الناس، فبقى عندهم إحساس بالحماية تجاهها، وكل ما يشوفوني في الشارع بيقولولي خلي بالك منها»، مشيرًا إلى إن الناس شايفينها بنتهم الصغيرة اللي اتربوا معاها من خلال أعمالها الدرامية.

وكشف هشام جمال عن كواليس الزفاف قائلًا إن ليلى كانت حريصة إن كتب الكتاب يكون في يوم منفصل عن الفرح، لأنها بتحب الهدوء والبساطة، وأضاف: «كنت عايز أعملها فرح تبقى مبسوطة بيه، ولما لقيت المكان اللي كانت نفسها فيه مقفول حاولت أعمل حاجة شبهه، والحمد لله الحفلة كانت على قدنا وشبهنا».

أما عن طابع الحفل فقال: «الفرح كان بسيط بس صادق.. مش بهرجة، كنا عايزين يوم يفضل في ذاكرتنا بحبه وصدق مش بمظاهر».

وفي ختام اللقاء، وجه هشام رسالة لزوجته قال فيها: «ربنا يخليكي ليا يا ليلى ويديم علينا السعادة»، لترد عليه بابتسامة: «وأنت كمان يا هشام.. ربنا ما يحرمني منك».