عبد الله مشرف: كل أولادي بنات.. والفن جزء من حياتي اليومية

في لقاء حصري مع برنامج "كلام الناس" على قناة MBC مصر، كشف الفنان القدير عبد الله مشرف عن تفاصيل حياته العائلية والفنية، مؤكدًا أن وجود أحفاده حوله يمثل له سعادة كبيرة.

وقال مشرف: "كل أولادي بنات وما عنديش ولاد، وأحفادي قاعدين على طول في البيت، وده بيخليني سعيد جدًا لأن أحب وجودهم حواليّ".

وتطرق الفنان الكبير إلى علاقته بزملائه في الوسط الفني، وأشاد بالنجم عادل إمام قائلاً: "عادل بيحب كل الناس ومافيش حد مش بيحبه، وأنا اتبسط جدًا بالشغل معاه لأنه فنان عظيم وبيقدّر كل اللي حواليه".

كما استرجع ذكرياته في فيلم "الكيف" مع النجم الراحل محمود عبد العزيز، موضحًا: "اتبسطت جدًا في الفيلم، ومحمود عبد العزيز كان بيحب الناس كلها، وكلنا كنا بنحبه ونقدّره".

وحول اعتزاله، أوضح مشرف: "مافيش حاجة اسمها اعتزال للفنان، لأن الفن جزء من دمي ومش ممكن أسيبه، والفن دايمًا في خيالي وفي حبي وفي شغلي".

وأشار إلى تنوع الأدوار التي قدمها خلال مشواره الفني: "ما اشتغلتش حاجة ما بحبهاش، كل دور كنت فيه بحبه، سواء كان شر أو طيبة، وكل الأفلام القديمة ليها طعمها الجميل".

واختتم الفنان حديثه مؤكداً على أهمية العلاقات الإنسانية في الوسط الفني: "لما بقابل الفنانين بالصدفة، نسلم على بعض ونرحب ببعض بكل محبة، والحمد لله صحتي كويسة وبشكر ربنا على نعمة الصحة".