نهال طايل عن وفاة إسماعيل الليثي: “راح للي أحن مننا”

 وجهت الإعلامية نهال طايل رسالة صريحة ومؤثرة بعد رحيل المطرب الشعبي إسماعيل الليثي، اللي وفاته هزت قلوب جمهوره ومحبيه.

نهال، وخلال تقديمها برنامجها تفاصيل على قناة صدى البلد 2، خرجت عن صمتها لترد على موجة التعليقات القاسية اللي طالت الراحل، وقالت: “في ناس عايشة بس علشان تجرّح في غيرها، وكأن ده هدفهم في الحياة”.

وأضافت إن البعض كان بينتقد الليثي لأنه كان بيغني في الأفراح، لكنها ردت بحدة قائلة: “كل واحد يخليه في حاله، ممكن يكون اللي بننتقده ده أحسن عند ربنا مننا”.

وروت موقفًا مؤثرًا حصل ليها أثناء العمرة، لما كانت وسط آلاف المصلين، وشمت ريحة أكل من سيدة كانت داخلة تصلي، وقالت: “مكنتش أقدر أتكلم.. يمكن الست دي عند ربنا أحسن مني”.

نهال شددت على إن الدين مش بالمظهر ولا بالكلام، لكن بالمعاملة، وقالت: “المسلم من سلم الناس من شره، قبل ما نصلي ونسجد، لازم الناس تسلم من أذانا”.

وختمت كلامها برسالة حزينة لكنها صادقة: “إسماعيل الليثي مات.. السنة اللي فاتت قطعناه ومحدش رحمه، دلوقتي راح للي أحن مننا، وكل واحد كتب كلمة جارحة هيندم عليها”.