لمياء أحمد راتب توجه رسالة رثاء لوالدها: "9 سنين يا بابا"

 وجهت لمياء ابنة الفنان الراحل أحمد راتب، رسالة رثاء لوالدها الذي يعد اليوم الأحد 14 ديسمبر ذكرى وفاته.

وقالت لمياء أحمد راتب: "١٤ ديسمبر ٢٠١٦ اليوم اللي اتغيرت فيه كل ملامح حياتي، اليوم اللي إنتهت فيه أيامي كإبنة مدللة وبدأت حياتي اللي بدور فيها على بابا، اليوم اللي الشيب غطى راسي والظلام ملأ قلبي، شكل الدنيا بعد التاريخ ده لا يمت بصلة لشكل الدنيا قبله". 

وتابعت: "يوم ما أبويا مشي وسابني.. سابني أسأل نفسي هعيش إزاي من غيرك؟ مين يعني هيملى مكانك؟ إزاي كدة مبقتش موجود؟ طيب مشيت وأنت عارف انت عندنا ايه؟ حاسس بيا أصلا دلوقتي وباللي حصل لي في غيابك؟". 

واستكملت: "أديني عشت بنص قلب يا بابا، عشت بلا أب و ما أدراكم ما الحياة بلا أب..هتفضل تايه..عندك كلام كتير مش عارف تقوله لمين، نفسك في حضن مش هتلاقيه عند حد تاني في الدنيا". 

وأضافت: "أبويا مكانش أب عادي، أبويا كان فيه صفات الأب اللي تتمناه أي بنت في الكون..  أتخطى إيه؟ إني كل لما أحتاج أبويا مش بلاقيه؟ إني لسه بدور عليه في كل الناس؟ إني بتيجي عليا لحظات أفضل أقول لنفسي بابا مشي، بابا مشي.. عشان أصدق ومتجننش؟، يا بابا وحشتني يا بابا..٩ سنين يا بابا؟".