نجل الماكيير محمد عبدالحميد يكشف تفاصيل آخر صورة لوالده الراحل

 كشف الفنان أحمد عبدالحميد نجل الماكيير الراحل محمد عبدالحميد الذي عمل مع عدد كبير من نجوم الفن، تفاصيل آخر صورة له مع والده قبل وفاته. 

وقال أحمد عبدالحميد: "الصورة دي من أخر عيد ميلاد ليك.. وأنا بتصورها معاك كان قلبي بيقولي ده آخر عيد ميلاد ليك و آخر مرة هقدر أفرحك.. بس ولا أنا ولا أنت كنا عارفين إن فرحك جاي وإن ربنا هيرزقك البداية الأبدية في جنته إن شاء الله بوجه مستبشر كدة زي ما كل اللى ودعوك شافوه". 

وتابع: "كنت آخر سنين تقولي أنا اتنسيت خلاص يا أحمد ولما أقولك فلان بيقولي سلملي على " الأستاذ" تقولي ياااه فيه الخير الحمد لله أنه لسه فاكرني أو لسه فكراني .. لو شفت حب الناس ليك بعد ما مشيت سواء في خارجتك أو في عزاك أو حتى على صفحاتهم هتعرف قد إيه أنت كنت عظيم وهتفضل تاريخ وهتفضل سيرتك حلوة وساترنا طول ما احنا عايشين". 

وأضاف: "بس أنا عارف إن كل ده ولا يشغلك دلوقتي يا عم وأنت منعم في جنة الرحمن مع حبايبك كلهم وهو ده عزائي الوحيد، ربنا يرحمك يا أطيب قلب وأحسن أب ويجعلني خير خلف ليك وأفضل محافظ على اسمك وسيرتك وأخلاقك اللي سايبها في قلوب الناس.. أشوفك على خير يا حمادة".