كاميليا تروي لـ"مصر الآن" قصة معاناتها مع الجن وما حدث مع سيارتها الخاصة

تحدثت المطربة كاميليا، عن قصة معاناتها مع الجن واضطرارها لبيع سيارتها الخاصة التي شهدت عدة وقائع مختلفة فيها. 

وقالت كاميليا في تصريحات خاصة لـ"مصر الآن": "كنت بطلع بعربيتي شغل، وفي يوم ما كان عندي شغل في بورسعيد، واحنا راجعين لقيت بنتين وولد واقفين في ليلة رأس السنة في مكان مقطوع والجو كان برد جدا، ووقفتلهم في الطريق وكانت أول مرة أقف لحد في الطريق، قولتلهم تعالوا وركبوا في العربية، ولقيت تفتيش في الطريق، فقولتلهم يا جماعة اللي معاه بطايق يحضرها عشان فيه كمين، وببص كدة لقيت الـ 3 اختفوا من العربية، ودخلت في حالة من الرعب ومروحتش بيتي في اليوم ده لأني كنت مرعوبة لدرجة إني كنت حاسة اني في عمل فني". 

وتابعت: "قولت لجوزي وقتها مش هرجع على المنصورة وهروح رأس البر من كتر الرعب اللي أنا كنت فيه.. بعدها بقيت أشوف حاجات غريبة في العربية، ولقيت ذهب ومحطوط في مكان معين، وكنت بستغرب ده جه منين، وكمان لقيت (الشوز بتاعي في العربية)، و(أبص في المرايا ألاقي عنين حمراء بتبصلي)".

وأضافت كاميليا باكية: "عرفت بعد كدة حكاية العربية دي، اللي عمرها ما عطلت بيا في مكان، وقررت أبيع العربية بسبب اللي كنت بشوفه فيها، وعرفت إنه كان معمول بيها حادثة كبيرة وكان متوفي فيها البنتين والولد، وجولي في الحلم، وحاسة انهم قريبين مني لحد دلوقتي، ولما بعت العربية اختفوا واختفى الخير معاهم".

يذكر أن، كاميليا غابت عن الساحة الفنية لما يقرب من 15 عاما، وكانت قد أثارت جدلا كبيرا منذ ظهورها على الساحة الفنية في الألفية الثانية، وتنبأ لها الكثيرون أن تكون خليفة الفنانة الراحلة ذكرى، ودخلت عالم اللفن بعد غنائها بحفل افتتاح مكتبة المنصورة، واختارت اسمها الفنانة الكبيرة ليلي علوي.