ماذا قالت رانيا فريد شوقي عن محمد صلاح وحسام حسن قبل مباراة كوت ديفوار؟

تحدثت الفنانة رانيا فريد شوقي، عن الكابتن حسام حسن مدرب المنتخب الوطني، وأيضا نجم المنتخب الوطني الكابتن محمد صلاح ولاعب فريق ليفربول الإنجليزي، وذلك قبل مباراة مصر مع كوت ديفوار في دور ربع نهائي أمم إفريقيا يوم السبت 10 يناير الساعة التاسعة مساء. 

وقالت رانيا فريد شوقي: "أنا عارفة إن البوست ده هيجبلي وجع الدماغ، من البداية كده خلينا نفرّق بين النقد والتجريح النقد البنّاء مطلوب ومحدش يختلف عليه لكن لما يزيد عن حده بيتحوّل لقسوة بتضر أكتر ما تفيد واللي بيحصل مع محمد صلاح مش مجرد اختلاف فني قد ما هو تحميل زيادة عن اللزوم مع إن منتخب كامل بيلعب والنتايج الحمد لله لسه كويسة و عارفة ان ده علي اعصابنا و نفسنا نحقق حلم الثامنة". 

وتابعت: "صلاح مش ملاك ولا فوق الحساب لكنه إنسان بيتعب وبيغلط وبيحاول ومش منطقي يتحط عليه حمل فريق كامل ولا يبقى شماعة لأي إحباط ونجاحه الكبير بيستفز البعض بدل ما يفرح، بس إحنا عايشين حالة استقطاب حاد بقالنا فترة كبيرة كل حاجة يا مع يا ضد وصلاح تحديدًا طالع من المقاولون العرب يعني برّه الانتماء التقليدي لا أهلاوي ولا زملكاوي فبقى من غير ظهر جماهيري محلي يحميه فبقى أسهل هدف للهجوم من كل الأطراف". 

واستكملت: "وفيه ناس مصره تقارن بينه وبين أساطير في الكورة المصرية مع إن كل واحد فيهم له زمنه وتجربته وإنجازاته وهو قدر يفتح باب العالمية ويكتب اسم مصر في مكان جديد وده لا يقلّل من أي حد لأن في الآخر كلهم بنحبهم ونفتخر بيهم تاريخ مشرف باسم مصر". 

وأوضحت: "ومع الاستقطاب بيطلع بعض البرامج وصفحات ولجان على السوشيال ميديا بتشتغل بالتريند والمصالح والكراهية أكتر من التحليل". 

واكملت: "ونفس المنطق بينطبق على المدرب حسام حسن هو كمان إنسان بيغلط وده طبيعي لكنه مدرب مصري بيشتغل بقلبه ونختلف معاه ونناقش اختياراته من غير ما نجرّحه وكمان لازم نفتكر إن القسوة مش بتقف عند لاعب أو مدرب دي بتوصل لكل لاعيبة المنتخب دول بشر وراهم بيوت وعائلات بتقرأ وبتتأثر والنقد البنّاء مهم ومحدش يختلف عليه بس لما يزيد عن حدّه بيضر أكتر ما يفيد خصوصًا إن النتائج الحمد لله لسه كويسة". 

وأضافت: "دلوقتي المطلوب هو التشجيع والدعم والنقد البناء المحترم، نقد يساعد ويقوم مش يكسر خلينا في ضهر منتخبنا للأسف لما الكورة تتحول لحرب استقطاب ومصالح المنتخب دايمًا هو اللي بيدفع التمن
وشكرًا لكل قلب نضيف ولسان محترم لسه ثابت في الزمن ده، ربنا يوفق منتخب مصر، يا رب فرحنا فرحة من القلب".