"لا يصلح للعمل كمخرج" ياسر سامي يرد على تصريحات صلاح الجهيني

 رد المخرج ياسر سامي، على تصريحات المؤلف صلاح الجهيني وهجومه عليه.

وقال المخرج ياسر سامي:"الحقيقة طوال حياتي المهنية الطويلة واللي إشتغلت فيها مع كبار المؤلفين المحترمين وكبار شركات الإنتاج المصرية والعربية والمنصات العالمية وكبار نجوم ونجمات مصر والعالم العربى لم أنخرط يوما في مشادات ومهاترات السوشيال ميديا لأني شايف إن إللي بيعمل كده ببساطه فاضي و تافه وبيبحث عن تريند رخيص ، بس بما إن الاخ صلاح الجهيني ذكر إسمي في منشور ، فوجب الرد".

أولا: دور الأستاذ والظهور الإعلامي والتحدث بصيغة العارف بالسيناريو والإنتاج والإخراج مش لايق عليك لأنك لا دارس ولا فاهم ومجرد بلونة أفلام أكشن تجارية ذات بلوت تويست مكرر صنع نجاحها مخرج واحد عملاق إسمه طارق العريان ونجوم جماهيريين كبار قدروا يصنعوا من ورقك الفسيخ شربات، و لو شلت طارق العريان من تاريخك والدعم السعودي العظيم، هنلاقيك واقف لسه في طابور على باب مكتبي عايز تقابلني لأني مخرج  ناجح وليا اسمي من أيام ما أنت مكنش حد يعرف عنك حاجة.

ثانيا: لو نظرنا لأفلام حضرتك مش هتلاقي لا قيمة ولا رسالة ولا هدف غير الإيرادات وبس فسيب التنظير لناس عندها أعمال ليها أثر وثقل هيفضل في التاريخ.

ثالثا: إنت لو فنان بشلن أو حتى إنسان بربع جنيه كنت سيطرت على نفسك قبل ما تخش تغلط فيا لأنك عايز تعمل تريند بعد اربع سنين من تصوير الفيلم ولا يوجد أي رابط أو تواصل بيني وبينك من وقتها واللي حصل بنا خلاف شغل ليه وجهات نظر مختلفة واساسه بخل إنتاجي 
 لكن للأسف إنت إنسان تعبان وفاضي لذلك مهما تعوي في بوستات جايه مش هرد لأني ببساطة مش فاضيلك".

وأخيرا: اذا أتتك مذمتي من ناقص .. فهى الشهادة لي بأني كامل".

وكان المؤلف صلاح الجهيني قال في تصريحاته عن ياسر سامي:"أنا مقولتش عن ياسر سامي انه لا يصلح لإخراج فيلم المطاريد، أنا قولت أنه لا يصلح للعمل كمخرج من أصله، وأنا اتمنالك فعلا إنه ينجح في اي عمل بحياته بعد سلسلة الفشل الذريعة دي، عشان يبقى على نفس مستوايا ويعرف يرد عليا".