"حاسة اني بموت" أول تعليق لـ رحمة أحمد بعد إعلانها اعتزال التمثيل

 نفت الفنانة رحمة أحمد، اتجاهها للحجاب بعد إعلانها إعتزال التمثيل، معلنة سبب اتخاذها لهذا القرار.  

وقالت رحمة أحمد: "أنا محدش يعرفني ومحدش مهتم بأخباري غير اللي بدأوا معايا رحلة وعارفني كويس اللي معظمهم على صفحتي دي أنا مش جاية أعمل تريند علشان كدة ردي هيكون على صفحتي للناس اللي يهمها ردي". 

وتابعت: "أنا مقولتش اتحجبت زي ما الصفحات بتنزل مع إن ده شئ يسعدني ومش معنى اني مش محجبة اني معرفش ربنا (ربنا عالم بالنوايا والناس ملهاش إلا الظاهر) أنا قولت كفاية تمثيل ومش معنى كده اني بقول أنا توبت، توبت دي لما أكون كنت بستخدم مهنة التمثيل في حاجة حرام أو حاجة غلط  والحاجات اللي اشتغلتها واختارتها أكبر دليل، لكن بالعكس أنا بحترم الفن جدا جدا ويمكن ده سبب ابتعادي عنه لاني علشان اشتغل وأتواجد ويكون ليا أدوار حلوة مضطرة ادفع تمن  كبير سواء مجاملات أو اساءات او تعدي عليا او مساومات من بعض المخرجين والمنتجين وأحيانا نجوم، علشان أعمل الدور ده لازم أوافق على حاجة معينة طبعا مش كل الناس كدة و دي مهنة زي أي مهنة فيها الكويس والوحش، أنا بحترم الفن جدا وبحترم الفنانين اللي بجد واللي بيقول مين دي دي مظهرتش غير في عملين تلاته أنا عملت أدوار بسيطة ىه برغم اني عملت مسرح كتير وفي سنين شقى ودراسة ولما قالوا اهتموا بالسوشيال ميديا اهتمينا وفخورة بيهم جدا حتى لو أنت شايفهم أدوار مهمشة". 
 
 وأكملت: "جالي فرص أعمل أدوار أكبر وجاتلي كتير بس المقابل كان هياخد حتة من انسانيتي وصدق مشاعري واللي عارفني عن قرب عارف أنا بتكلم في إيه 
وحتى ده دفعت تمنه غالي من الناس اللي يقولي انتي كومبارس واللي بيقول انتي مش لاقية اللي يشغلك علشان الفرص المحترمة أو خليني أقول الفرص "الفنية" االلي جتلي في التمثيل كانت صغيرة وكنت بقبل بيها لأنها كلها أعمال محترمة لمخرجين فنانين ومحترمين وقبل كل ده عندهم إنسانية وأصول في الشغلانة". 

واستكملت: "أنا حاليا بقالي فترة كبيرة واقعة في صراع بين اني أكمل وأفضل قوية واستنى الفرصة اللي معتمدة على موهبتي في عمل حقيقي محترم يحترم موهبتي وانسانيتي أو أدفع تمن ده من حياتي النفسية والضغط المادي اللي بتعرضله لقلة الشغل، واستحمل كلام من الناس يوجع وياكل في نفسيتي بردوا وأتحمل اهانة اني بختار أشتغل في أدوار صغيرة وأعمل مجهود كبير فيها واللي فيه ناس بتوقفني في الشارع تكلمني عنها وتكون مبسوطة بيها ومستنية تسمع هشتغل تاني في ايه   برغم انها صغيرة جدا". 

وتابعت: "ولا أبيع قلبي وأبيع صدق مشاعري وأتحول لكائن تاني معرفوش، مكدبش عليكوا حاولت كإنسانة عادي أتكيف وأحاول أمشي أموري بس معرفتش  في حاجة جوايا في ضميري (ممكن تكون مش صح في الدنيا دي)  خلتني معرفش أعمل كده، معرفتش أتصلق ولا عرفت أستغل مشاعر واحد ليا وأطلع عليه ولا عرفت أعشم حد كان في ايده مساعدة ليا لحد ما أخد مصلحتي وأطير، معرفتش". 

وأوضحت: "أنا أصلا مش عارفة بقول كل الهري ده ليه بس أنا حاسة اني بموت ومش عايزة أموت وأنا شايلة في قلبي حاجة زي اللي مشيوا في عز شبابهم، عايزة أمشي وأنا خفيفة، أنا متشكرة جدا لاي حد ساعدني في الوسط ده حتى لو بتشجيع معنوي أو حاول يديني فرصة حتى لو صغيرة أو حد قالي انتي شاطرة ده اللي كان بيخليني أكمل وكان بيخليني أحس اني موهوبة برغم شكي دايما في موهبتي". 

وأختتمت كلامها: "مش مسامحة أبدا أي حد اتكلم في ضهري وانا أصلا في حالي ، ولا حد كان في ايده يساعدني وعارف اني استاهل ولا حد جه وساومني على شغل وكان عايز مني خدمة تانية غير اني أكون ممثلة وأي حد وقفلي شغل علشان ممسكتش الطبلة، وعايزة أقول حاجة بسيطة للناس الفنان المصري أكتر فنان مظلوم و أكتر فنان موهوب وكل العالم بيحترمه خصوصا انه بيشتغل في ظروف صعبة جدا وبراحة على الناس شوية لأن فيه ناس ممكن يتكسر قلبها وتموت من كلمة انت فاكر إنها عادية، وكلمة كومبارس اللي انت فاكر انك بتجرحني بيها دي متعرفش في كواليسها أنا كنت بطلة وقوية إزاي".