مدحت صالح يكشف عن عمله في “نايت كلوب” و تفاصيل أزمة مالية عانى منها في بداية مسيرته الفنية

تحدث الفنان مدحت صالح، عن بداية مشواره الفني، ورحلته ليصبح من أشهر الفنانين العرب، وذلك من خلال حلقة خاصة مع الإعلامي محمود سعد.

وقال مدحت صالح في لقاءه: “جبت سنة 79 عربية سيات أول ما طلعت، وكنت محتاج ضعفين المرتب عشان أدفع قسط العربية وكان أول وآخر قسط في حياتي، ولما اتعذبت بطلت الأقساط”.

وتابع متحدثا عن الأزمة المالية التي كان يعاني منها في بداية حياته: “مكنتش بحب النقطة، بس عمر فتحي -الله يرحمه- أقنعني آخد النقطة، هو كان بياخد وأنا لا، وقالي احنا مش بنضرب الناس على إيدها ولا بنمد إيدينا في جيب حد، ولما قررت آخد النقطة كنت بشتغل عند الست شريفة فاضل في كازينو الليل، وكنت متفق إني مش هاخد كيت -نُقطة- بشتغل في نايت كلوب بس بطريقتي، وفي نفس الوقت مش بناخد مبلغ كبير تقريبًا كان 180 أو 185 جنيه في الليلة ولما طلبت أزود قالتلي مفيش ما أنت اللي عامل في نفسك كده أنت ممكن تبقى أغنى واحد فينا كلنا والناس بتحبك لو خدت الكيت”.

وعن سبب غناءه وهو يُغمض عينيه قال مدحت صالح أنه اعتاد على ذلك، وأضاف: “النُقطة مش بياخدها المطرب كاملة، فيه تلت للمكان وتلت للأوركسترا وتلت للفنان، وبعد ما كنت بروح الصافي بتاعي 45 جنيه بقيت بروح 5 و6 آلاف جنيه في اليوم  الفلوس بتدفي لما بتبقى بتعب، نزلت شارع الهرم لمدة سنتين بس، غنيت في كازينو شاليمار وعند أمين بيه سامي، حوشت سنتين وبعدين ركبت عربية بيجو 503 ودفعت فلوسها كاش، الفلوس جات آخر 3 شهور في شارع الهرم، الدنيا كانت هتختلف لو كنت من الأول بقبل الكيت، وقبلته عشان عايز أجمع 16 ألف جنيه لإنتاج ألبوم السهرة تحلى، وأول دخل جالي من الألبوم نزلت دفعت مقدم لعربية مرسيدس”.