ملك أحمد زاهر تكشف عن وعكة صحية مفاجئة: "حياتي مش ورد"

كشفت الفنانة الشابة ملك أحمد زاهر عن تعرضها لوعكة صحية مفاجئة، وذلك عبر خاصية "الاستوري" بحسابها الشخصي على موقع التواصل الاجتماعي "إنستغرام". 

في منشور مؤثر، كتبت ملك زاهر: "أنا عمري ما كنت بنزل غير الحاجات اللذيذة أو الهزار أو أي حاجة إيجابية من الآخر، ولما كنت أحب أنزل حاجة سلبية كنت بأخذها بهزار وبنزلها close friends وبهزر بيني وبين صحابي، بس بجد حاسة إن الفترة الأخيرة بيجي لي كومنتس كلها مانتي عايشة ومبسوطة".

وأضافت معبرة عن الضغوط التي تواجهها: "إحنا مش عايشين، وإيه كل اللي أنتو فيه، وحاسة إن الناس باصة على أتفه الحاجات اللي ممكن تكون عندي أو بتبسطني، زي مثلًا إني أنزل أروح الجيم أو أخرج مع صحابي أو يكون شكلي حلو وأنا رايحة إيفنت معين".

كشفت الفنانة عن تفاصيل وعكتها الصحية المفاجئة قائلة: "حبيت بس أقول لكم إن الحياة مش وردي، أنا بقى لي 3 أيام تعبانة شوية وعندي حاجة لحد دلوقتي مش فاهمين سببها، وجت فجأة وفي حوالي نصف ساعة قبلها كنت زي الفل، ومن ساعتها مش عارفة أنزل أو حد يشوفني باللي أنا فيه ده ونفسيتي وحشة قوي".

وتابعت ملك مؤكدة رغبتها في مشاركة الجمهور الجانب الآخر من حياتها: "أنا باحكي الكلام ده عشان تعرفوا بس إن حياتي فيها الحلو والوحش والله زي أي حد، بس أنا باحب دايماً أشارك الحلو بس وغالباً ده غلط، فقررت أشارككم كمان الوحش، ومع إن اللي بيحصل لي دلوقتي أنا بأحمد ربنا عليه وعارفة إنه بإذن الله هيكون حاجة بسيطة وإن شاء الله هاخف وكله هيكون تمام، بس هو مخلي نفسيتي وحشة قوي حقيقي، كل اللي طالباه إنكم ما تحكموش على حد من السوشيال ميديا أو من ظهوره في أي حاجة؛ لأنها بتوري بس يمكن 20% من حياته، وادعوا لي".