يسرا اللوزي ترد على الجدل: لم أذكر الكشري ولم أقارن بين المطبخ المصري والسوري
خرجت الفنانة يسرا اللوزي عن صمتها لتوضيح حقيقة تصريحاتها الأخيرة عن الأكل المصري والسوري، والتي أثارت موجة انتقادات واسعة على مواقع التواصل الاجتماعي خلال الأيام الماضية.
وكتبت يسرا اللوزي عبر حسابها على فيسبوك: "أنا ما جبتش سيرة الكشري خالص، أنا كنت هقول كيس شيبسي اللي أحيانا كتير إحنا كمصريين بنسكت بيه جوعنا، وأنا شخصيًا بعمل كده ساعات عادي، وبعدين قررت ما أقولش اسم براند بعينه فما حددتش كيس إيه".
وأكدت أنها لم تقارن بين المطبخ المصري والمطبخ السوري من الأساس، موضحة: "الاجتهادات الذاتية دي غير مرحب بيها، أنا اتكلمت عن سمة في شخصيتي في الفيلم اللي بتشتغل food blogger، ووصفت الشخصية على إنها نمكية في الأكل وإني أنا كمان للأسف صعبة شوية في النقطة دي زي الشخصية، لأن الصحفيين كانوا بيسألوا عن أوجه التشابه بيني وبين شخصية مها اللي بلعبها في فيلم برلين".
وشددت يسرا اللوزي على حبها للمطبخين بنفس القدر، قائلة: "هل أنا اتكلمت عن الفرق بين المطبخين؟ لا، لأني في الواقع بحب الاتنين زي بعض بالظبط، اللي حابب يعمل بحث ويدور على لقاءات سابقة على مر السنين هيلاقي دايمًا إن كل ما يسألوني عن أكلاتي المفضلة، الإجابة بتكون كشري أو ملوخية أو محشي كرنب".
واختتمت حديثها برفض تفسير كلامها خارج سياقه، قائلة: "كون إن حد يقرر يفسر الكلام من غير ما يعرف السياق اللي اتسأل فيه السؤال، ومش عارف السؤال أصلًا وياخد الإجابة لوحدها، ويضيف عليها تفسيره غير الصحيح دي حاجة غير مقبولة الحقيقة".






